काठमाडौँ÷ सांसदहरुले कञ्चनपुरकी बालिका निर्मला पन्तको बलात्कारपछि भएको हत्याको घटनामा संलग्नलाई समात्न नसकेको भन्दै सरकारको चर्को आलोचना गरेका छन् ।
बुधबार बसेको प्रतिनिधि सभाको बैठकमा गृहमन्त्री रामबहादुर थापासँगको सवाल जबाफसत्रमा सहभागी हुँदै सांसदहरुले निर्मला प्रकरणमा संलग्नलाई सरकारले नै जोगाउन खोजेको आरोप लगाएका हुन ।
नेपाली कांग्रेसकी सांसद डिला संग्रौलाले निर्मला प्रकरणमा सरकार असफल भएको दाबी गदै अपराधीलाई पनि जोगाउन सरकार लागेको आरोप लगाइन् ।
निर्मलाका हत्यारा बालुवाटारमा छन् कि सिंहदरबारमा छन् भन्ने प्रश्न गदै उनले अपराधीलाई चाँडो भन्दा चाँडो कानुनकी दायरामा ल्याउन सक्नुपर्ने बताइन ।
सांसदहरुको प्रश्नको उत्तर दिँदै गृहमन्त्री थापाले निर्मला हत्या प्रकरण टुंगोमा पुग्न लागिसकेको बताउँदै चाँडै टुंगोमा पुग्ने आश्वासन दिएका छन् । थापाले अपराधीहरुलाई कुनै पनि हालतमा छाड्न नसकिने बताउँदै प्रहरीले गम्भीर अनुसन्धान गरिरहेको बताए ।
मन्त्री थापाले नेपाल प्रहरी अपराध अनुसन्धानमा ९६ प्रतिशतसम्म सफलता प्राप्त भएको दाबी गरे ।
