कोइरालाले भनेका थिए : प्रजातन्त्रप्रति समर्पितलाई बिर्सने चलन देखियो

कोइरालाले भनेका थिए : प्रजातन्त्रप्रति समर्पितलाई बिर्सने चलन देखियो

५ चैत, विराटनगर । नेपालको प्रजातान्त्रिक र लोकतान्त्रिक आन्दोलनमा सक्रिय रहेका कांग्रेस नेता अशोक कोइरालाले जीवनको उत्तरार्धमा भनेका थिए, ‘प्रजातन्त्र प्राप्तिको आन्दोलनमा समर्पित रहेकालाई बिर्सेने चलन देखियो ।’

बिहीबार बिहान ७७ वर्षको उमेरमा निधन भएका कोइरालाले माघ २ गते आयोजित एक कार्यक्रममा ‘प्रजातन्त्रप्रति समर्पित व्यक्तिलाई बिर्सने चलन चलेको’ बताएका थिए ।

स्वास्थ्य समस्याका कारण केही वर्षयता उनी सक्रिय राजनीतिमा थिएनन् । गत माघ २ गते कोइराला निवासमा निरञ्जन कोइरालाको श्रद्धाञ्जलीसभामा सहभागी भएयता उनी सार्वजनिक कार्यक्रममा देखिएनन् ।

श्रद्धाञ्जलीसभामा उनले प्रजातन्त्रप्रति समर्पित मानिसलाई अहिले बिर्सने चलन चलेको गुनासो गरेका थिए । ‘प्रजातान्त्रिक आन्दोलनप्रति समर्पित, प्रजातन्त्रका लागि योगदान गरेका र लडेका मानिसलाई बिर्सने चलन आयो,’ कांग्रेस नेता शेखर कोइराला सहभागी कार्यक्रममा उनले भनेका थिए, ‘अहिले आउने पिँढीलाई जानकारी छैन, यो कुरा सबैले जान्न आवश्यक छ ।’

नेपाली कांग्रेस मोरङको तीन कार्यकाल सभापति बनेका कोइराला विराटनगर उपमहानगरपालिकाको पहिलो निर्वाचित मेयर पनि हुन् । २०४९ सालमा मेयरमा निर्वाचित भएका कोइरालाले विराटनगरको विकासमा महत्वपूर्ण योगदान दिएको विराटनगर महानगरपालिकाका मेयर भीम पराजुलीले स्मरण गरे ।

नेपालको लोकतान्त्रिक आन्दोलनमा कोइरालाको योगदान महत्वपूर्ण रहेको उनले बताए । लोकतन्त्रकै लागि लडेका कोइराला पट्क पटक जेलमा बसेको उनले बताए ।

जेलमा बस्दा कोइरालालाई मलद्वारमा नुन, खुर्सादी दलेर समेत यातना दिइएको उनले बताए । मेयर पराजुलीका अनुसार २०६२-६३ सालको आन्दोलनमा खटिँदा कोइरालाको टाउकोमा प्रहरीले लाठी हानेको थियो ।

कोइरालाको निधनप्रति कांग्रेस सभापति शेरबहादुर देउवा र वरिष्ठ नेता रामचन्द्र पौडेलले श्रद्धाञ्जली दिएका छन् । ‘नेपाली कांग्रेसका नेता एवं मेरा मित्र अशोक कोइरालाको निधनको खबरले निकै मर्माहित भएको छु’, देउवाले लेखेका छन्, ‘उहाँको निधनले कांग्रेसले एउटा असल नेता गुमाएको छ ।’

कांग्रेसका वरिष्ठ नेता रामचन्ऽ पौडेलले नेपालको लोकतान्त्रिक आन्दोलनमा स्वर्गीय अशोक कोइरालाको योगदान शब्दमा ब्याख्या गर्न नसकिने बताएका छन् ।

‘अशोक कोइरालाको निधनबाट नेपाली कांग्रेसले एक असल र महत्वपूर्ण अभिभावक गुमाएको छ’, उनले लेखेका छन्, ‘नेपाली कांग्रेसको पूर्वसभापति एंव पूर्वप्रधानमन्त्री सुशील कोइरालाका सहोदर भाइ कोइरालाले नेपालको लोकतान्त्रिक आन्दोलनमा पुर्‍याएको योगदानको चर्चा शब्दमा गर्न सकिन्न ।’